Publicités

Hits: 442

“Klaw klaw”, “pow pow”, “kata kata”, “biw biw”, yè swa se ak son sa yo anpil moun nan kapital la dòmi. Son yo pa t twò diferan pou moun Lali, Poupla, Chanmas ak anviwon l yo, Dèlma, Nazon, Wout Ayewopò… Konsè katouch te pran vil la pou li.

Li te ka 11 zè nan aswè, mwen apèn ap gade yon dokimantè sou YouTube sou “istwa mezon blanch”, apre yon ti tan, anpil detonasyon ke m t ap viv fè m santi m ap swiv dokimantè YouTube sou peyi Siri tèlman zam chante tankou lasigal.

Dèfwa mwen tande son an pre, si kay mwen te an tòl mwen t ap kouri rantre anba kabann tèlman mwen frikat. Dèfwa mwen tande son an trè lwen (kòmkwa moun yo repliye). Dèfwa mwen gen enpresyon yon gwoup tire epi advèsè a reponn li pou l di l: Mwen gen bagay tou nan menm, pa vin fè k*** la. Chak son diferan, mezi zam ou, mezi son w.

Fò m di nou, li vrèman difisil pou m ta di se lapolis ki t ap tire ak sivil ame, se gwoup ame ak gwoup ame. Men, nou pa egare, nou konnen se pa zonbi ki t ap tire yè swa.

Gon moman, mwen panse se sèl bò lakay mwen ki tounen La Siri epi rès peyi a se Nouyòk (li safe). Kèk èd tan apre (vè minwi), yon zanmi ki rete wo Dèlma rele m epi l di m an blag “Jovenel ale, apa m tande pil tire (ri)…”

https://www.presslakay.net/wp-content/uploads/2019/10/AUD-20191029-WA0090_1572529235086.mp3?_=1

Mwen souri bay zanmi an epi m di l sou yon ton serye: “ou gran timoun, lè yon prezidan ale ou tande pil tire vre, men ou tande rele ki se rele kè kontan. Ou tande tire ou pa tande rele ki akonpaye l, kidonk ou nan yon fim gè san sal sinema”.

Apre ti pale ak zanmi an, mwen vin konfime pi plis se pa katye m nan sèlman ki tounen La Siri yè swa. Mwen vin ouvri entènèt mwen, dabitid gwoup Whatsapp moun pa konn pale twòp sou li zòn 1 nè di maten, lè m gade mwen wè pil mesaj, mwen santi bagay tire a anpil kote. Anpil kòmantè kote sitwayen yo fè konnen yo enkyè parapò ak tout katouch sa yo. Kòmantè yo pa t vrèman diferan paske prèske tout moun se menm son yo yo tande, prèske menm bagay yo y ap viv anndan kay yo.

Skason Baptiste, trè enfliyan sou rezo sosyo yo, pa t ret endiferan pou l mande moun k ap swiv li yo si yo tande sa l ap tande yo.

Nan Dèlma 37 se menm bagay la. Pil katouch, abitan zòn sa tande gwo machin k ap pase (tankou y ap etwaye lari a). Enfòmasyon ki rive jwenn sal redaksyon ajans lan ta fè kwè gaz lakrimojèn lanse nan zòn sa ki ta lakoz yon ti bebe pran ladan l.

Poukisa pil tire sa yo

Pa janm bliye sa, n ap viv nan yon peyi kote sa fè plizyè lane moun isi fè tout zam legal. Yon peyi kote grangou ak chomaj se yon pwoblèm grav, poutan zam ak katouch lage nan geto tankou grenn pinèz nan matla. Se pa mwen ki pral di w jounal Le Nouvelliste rapòte ke komisyon dezameman an fè konnen li resanse anviwon 76 gang ame sou bout tè papa Desalin lan. N ap viv yon kriz miltidimansyonèl egzajere ki atenn yon nivo santi di kote opozisyon ak pouvwa ap jwe pye ak men. Ou se ayisyen, se pa mwen ki pral di w chak aktè politik bezwen gen kontwòl ti gwoup nèg ak zam li pou enterè politik. Aktyèlman, nou nan yon peyi kote lapolis ak sivil nan yon afwontman ki dejenere pi plis nan peryòd sansib sa n ap viv depi plis pase 8 semèn.

Lè nou anglobe tout sa ki di la yo, nou sou wout yon eklatman. Li t ap dwòl anpil pou w pa tande katouch nan zòrèy ou. Pou jan barikad sa yo poste nan wout la, li t ap two fasil pou fòs lòd vini epi debare lari san pa gen tire…

Lontan gen zòn se lè match, jou fèt yon otorite, jou 31 desanm ou te konn tande tire, lè m ap leve se te Bèlè, Site Solèy ak kèk lòt zòn yo te konn di ki gen gwoup ame. Fenomèn sa chanje kèk tan, sa k ap pase Matisan, Gran Ravin ak lòt kote ki repite chaje zam, se sa k pase wo Dèlma, Petyonvil, Kanapevè elatriye. Tout zam legal nan tout katye, chak zòn gen pwòp ti chèf li k ap grandi. Pa etone si n ap viv konsè katouch. Se mèt kò ki veye kò, leta febli menm li menm nan ensekirite. Pridan chè entènot!

Dimitry Charles

Publicités