Qui peut dire à Michel Martelly de continuer avec ses diatribes ?

Samdi ki te 6 janvye 2018 pase a, Michel Martelly ak tout Gwoup li Sweet Micky te envite pou al patisipe nan 1e edisyon « Ayiti Mizik Festival », ki tap fèt nan Henfrasa, zòn Dèlma. Kontrèman ak anpil moun ki te panse ansyen Prezidan an ta pral « fake », ebyen pou yon ènyèn fwa, Sweet Micky te rete vrè moun li ye a, sa ki pa etone m, e nan sans sa mwen felisite konstans ansyen chèf leta a. Dayè m sonje li te deklare yon lè pandan l tap dirije peyi a « Si yon jou li tap sispann gouye, li ta sispann di betiz, konnen li fek, paske, chante, gouye, betize se nan li sa ye. » Li te menm ale pi lwen pou l te di nan mikwo Radyo Karayib, « Pa gen okenn diferans ant Sweet Micky, Michel Martelly, ak Bandi Legal la. », kòmsi li ta vle fè konnen, se yon sèl betizè an 3 pèsòn. (Sweet Micky le Président, Sweet Micky l’artiste ak Sweet Micky le bandit).

Kontrèman ak majorite moun kap mande Prezidan Martelly pou li sispann ak betiz li yo, mwen m ap mande ansyen Prezidan m nan pou li kontinye. Dayè, mande yon malpwòp pou l sispann fè malpwòpte, se pase l nan tenten. Se kòm mande yon kochon kreyòl pou l sispann benyen nan labou, se kòm mande yon cheval pou l sispann ranni, se kòm mande yon Wosinyòl pou l sispann chante. Kwè m si n vle, solèy la toujou cho kèlkeswa lè a, menm si w pa santi l, menm si w pa wè l.

Avan m adrese m ak ansyen Prezidan m, ban m di 2 mo ak sosyete m…

Tanpri Lasosyete, m ta renmen konnen poukisa nou pa sispann manje kay Sweet Micky olye n chita ap di l sispann kuit manje pou nou. Ou menm konpayi pwodiksyon nan peyi m, poukisa w te envite Sweet Micky, se pou l te vin fè repòtaj oubyen pou l te vin pèfome ? Poukisa nou pa te envite « Orchestre Tropicana D’ Haiti », se pou Ti Blanc Maestro pa te vin di betiz oubyen pou Doktè Dòy pa te vin solo kibòb ? Poukisa òganizatè pwogram yo anpil fwa, olye yo ENVITE BIC Tizon Dife, yo EVITE l, se pou li pa rantre nan manman sosyete san moral nap viv la ?

An verite an verite, m pa gen pou m blame Sweet la, m vle blame pito sosyete m nan ki pran plezi envesti nan imoralite ak nan malpwòpte. Sou ki baz paj Facebook « Tripotay Lakay » pi popilè pase paj Facebook « Jounal Le National » ak « Loop Haiti » tandiske tou lè 3 ap bay nouvèl ? Sou ki baz plizyè milye moun swete « RIP a Pè Joseph Simoly » sou rezo sosyal, apèn si gen 2 mesaj ki rive jwenn fanmiy Pè a, yon lòt bò, yon grenn sitwayen ki pote non Tony Mahotière (Tony Mix) fè yon grenn #tweet pou swete nanm « Paix Simoly repoze an père », mesaj sa touche prèske tout yon peyi a ? Sou ki baz yon videyo « Krèk koko Haiti » kap betize bò lari gen plis #vue pase yon videyo pou sansibilize moun sou edikasyon, ata menm nan seyans ofisyèl palmantè yo debat li ? Sou ki baz, nou vle pou Michel Martelly kuit manje nou pa konsome ? Dayè m pap etone m si se kèk ti grenn moun ki pataje tèks sa…

Kounye kite m poze 2 ti kesyon ak lapwès nan peyan m…

Chè medya, apa w ap mande pou Michel Martelly ta fè yon ti kanpe ? Wi monchè, ou ipokrit. Kote m te konn Sweet Micky, ou fin mete l sou tab pou m manje, lè map manje l ou di m li pa bon pou konsome.

Kote m tap konn sitwayen an si ou pa te konn pale m de, li fèt an 1961, mwen fèt an 1989, kidonk nou pa menm jenerasyon. Li fèt Pòtoprens, mwen soti Okap, kidonk, nou pa te vwazen. Li di li biseksyèl (doub SIM, li pran fanm, li pran gason), tandiske m se etewoseksyèl (1 sèl SIM), sa vle di nou pa frekante menm klèb. Li kòmanse fè Hit nan lane 1989 ak mizik li ki te rele Ou-la-la, nan epòk mwen pako te menm lage chita, vwa pou m te ka danse bal, se lè m grandi wi m tande w ap jwe mizik li. L ap mache jwe bal, di betiz pou betizè parèy li, map mache fè konferans ak fòmasyon pou jèn parèy mwen, sa vle di nou pa frekante menm espas travay. Dènye evènman li nan Henfrasa samdi 6 janvye pase a, mwen pa te menm Pòtoprens, mwen te jis nan Grandans, mwen tal rankontre ak jèn nan vil Jeremi, se ou wi Chè Pwès ki di m kòman Martelly rantre nan manman sosyete a tout longè, se ou menm ki di m li menase pou l vyole papa ak tonton kèk moun, tandiske ou pa di pèsòn kòman konferans mwen an te pase.

Ou menm, « Ticketmag Haiti » kap chèche yon moun pou di Martelly sispann… Poukisa w pa di l sa dirèkteman, se pa fanatik Sweet Micky ou ye ? Epi m ta renmen konnen poukisa w pa mande m kontinye ak « Respè Pou Ou » k ap onore yon valè nan sosyete ayisyèn nan chak mwa ? Map tann repons ou.

Ou menm ansyen Predizan m, tande m…

Monchè ou pa konnen m, mwen se Skason Baptiste, yon jèn gason 28 lane, m bay dezyèm ti gason w la 3 zan, sa vle di ou te ka papa m si se pou laj, kidonk m gen enterè ba w bon konsèy. Jan m sot di w la, ou pa konnen m, se mwen ki konnen w, medya tradisyonèl al medya sosyal yo toujou pale m de ou, yo di m ou se yon gwo atis, ou se sèl atis ki fè moun ri pandan wap manke yo dega sou tèt lajan yo, yo di m ou gen anpil lajan, ou se yon bon moun, ou ede moun ak yon Fondasyon ou genyen, yo di m tou ou gen yon Pati Politik, yo di m ou kandida pou 2011, a yo di m anpil bagay sou ou. M te vle di w « ADELANTE PREZIDAN MARTELLY ».

Poukisa pou w ta sispann ak betiz ou yo, lè n konsidere se betiz ou yo ki fè w fè siksè. Poze tèt ou kesyon ki entansyon moun kap mande w sispann yo ? Petèt se pou w ta sipann fè #Hit isit, oubyen pou nou ta sispann pale de ou. Petèt pou ou pa ta re eli Predizan peyi m an 2022, erezman Prezidan m, ou pa egare, je w pa nan bouda w.

Sa map di w la Prezidan, se vre wi. Pa okipe pyès moun kap di w sispann woule nan labou, yo yonn pa konprann peyi a. Pwochèn fwa yo mande w sispann di betiz, mande yo nan ki peyi ? Èske se nan sa lè w te Prezidan ki t ap RANSE a oubyen sa w te di ki t ap VANSE a ? M wè gen yon jèn ti powèt angaje yo bay pou Iléus Papillon (ou ka pa konnen l, dènyeman li tal fè yon metriz nan peyi Kanada, aaa… ou pap konnen pi rèd Prezidan, m bliye si w pa danse kole ak bagay yo rele diplòm nan), ebyen Prezidan, jèn powèt / jounalis / sosyològ sa mete ak anpil lòt ap di ò yo ap tann pou yo wè si komite Kanaval Nasyonal la ap ba w Cha pou kanaval ane sa, Prezidan mande yo nan ki peyi pou w pa ta jwenn Cha a, èske se sa ki SOU WOUT KANIVO a, oubyen sa SEM Jovenel Moïse di ki SOU WOUT CHANJMAN an ? Epi ki ta dwa komite a pou l pa ta ba w Cha, si w pa jwenn Cha, kilès kap gen kouraj pou oze rantre nan manman Président Jovenel Moïse ak tout Premye Dam Martine MOISE sou pakou kanaval la ? (An pasan, tan pou yo ta bay BIC Tizon Dife Cha, yo ta pito ba l yon Chaplèt)

Epi prezidan, m pa kwè w enbesil ase pou w ta kite moun sa yo pyeje w ak vye diskou yo genyen ki ta fè kwè ou pap ka Prezidan ankò, paske djòl ou twò sal…. Prezidan, se pi gwo erè w tap fè wi si w ta sispann desann pantalon w an piblik. Ou gen lè bliye Prezidan, se nan griyen bouda w devan kamera ak pete nan mikwo wi ki fè w te Prezidan sou Madàm Mirlande Manigat ki li menm gen doktora nan Syans Politik nan inivèsite « Sorbonne », ki pase prèske tout tan li nan ansèyman siperyè kòm pwofesè konstitisyonalis nan Inivèsite. Nan menm eleksyon sa, te gen : Jude Célestin, Jean-Henry Céant, Jacques Edouard Alexis, Charles Henri Baker, Doktè Josette Bijou, Yvon Neptune ak Eric Charles Smarki pou m site sa yo sèlman… Se ou menm dirèkteman wi, gwo blan te sipòte, ebyen Prezidan, depi blan vle w, se paske w bon. Vouzan pou lòt moun yo.

Prezidan ou gen lè pa sonje, lè w te 3èm nan eleksyon an ak 234,617 vwa, (swa 21.84%), Jean Chavannes Jeune ki li menm se gwo Pastè ak gran « P » pa te menm pami 5 premye, li te fè yon ti kaka aran vwa, 19,348 (swa 1.80%). Lòt bagay Prezidan, ou te tèlman bon pou nou, ou ofri nou Nèg Bannann nan, nou pran l, nou manje l san reflechi nan yon sèl bouche (1 sèl kout kle), nou manje l nan labouyi, nan patita, nou manje l ak salami, sa se pi gran prèv ou te bon pou nou. E wap toujou bon pou nou Prezidan. Nap pa ka tann pou Prezidan Jomo re bay nou Martelly an 2021.

Lòt bagay Prezidan, m vle pou al pi lwen, kontinye vanse, lè w rive etazini, rantre nan manman Michelle Obama tout longè, lè w al jwe an Frans, rantre anndan Brigitte Macron san mezire, si Emmanuel Macron fache, vyole papa l, vyole tonton l, fè sa tout kote w pase nan mond la, ou pa janm konnen, sa ka fè w rive sekretè jeneral United Nations.

Map fini pou m di w Prezidan, lajan « Petro Caribe » ou avwe ou vole a, nou byen kontan ou pa envestil nan rekonstriksyon Palè Nasyonal, men pito jan w di l la, ou te envesti l nan « Marriott Port-au-Prince Hotel Haiti », « Best Western Premier Petion-Ville » ak « NH Haiti El Rancho », sa ki ta fè plen etranje kap rantre vin fè touris isit chak jou tou, tout chanm otèl nou yo foul, nap tann ou konstrui lòt demi douzèn ou pwomèt la, konsa n ap ka resevwa anpil miye touris, menm jan chak jou nou voye ale plizyè milye jèn fanm kou gason, ti bebe kou ti granmounn pou al fè touris Brezil ak Chili.

Map fini la… map kite rès la pou liv mwen an…
Men avan m ale, poukisa pou betizè a pa kontinye betize, si sosyete a kontinye pran plezi nan betiz ? Poze tèt nou kesyon, Poukisa Martelly fè anpil tan ap viv Etazini, pa menm yon fwa li di jounalis Oprah Winfrey gen gwo bouda, pandan vire tounen l ap rantre nan dada jounalis Lilianne Pierre Paul ?

Jan m di nou an, se pa Martelly ki pou sispann di betiz, se ayisyen ak ayisyèn ki pou sispann betize. Si pa te gen malpwòp, malpwòpte pa tap janm vann nan mache, paske pa tap gen moun ki pou achte l. Si pami tout machann mizik ki nan mache, nou chwazi machande nan men Sweet Micky, nou achte nan men l, nou oblije konsome l wi, si nou mete n disponib pou n konsome l tou, li oblije kontinye kuit pou nou. « Adelante Prezidan Martelly !!! »

Ou menm kap li m, èske w te konnen, gen 2 gran fason ou ka konbat imoralite.
1- Swa w di ABA imoralite (Aba Michel Martelly )
2- Swa w di VIV moralite (Viv Moralite)
Nans sans sa, m chwazi sipòte moralite, se nan objektif sa mwen lanse (www.facebook.com/RespePouOu)

PS.

Chers frères et soeurs, c’est pas à Martelly de s’arrêter avec ses bêtises…. Se lapwès pou ki sispann pase betiz nan figi ak nan zòrèy moun… Se DCPJ ak Tribinal nou yo pou ki sispann vann imoral ak bandi ki plen move mès, sètifika « Bòn vi ak Mès »

« Mes chers concitoyens, nous sommes en 2018, nous devons nous arrêter avec nos bêtises et nos stupidités. » #SB

Skason Baptiste

Publicités

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.